Bakı şəhəri Xəzər rayonu, Türkan qəsəbəsində yaşayan bir neçə nəfər Baş prokurorluq önündə etiraz edərək şikayət ərizələrini həm prokurorluq əməkdaşlarına, həm də media nümayəndələrinə təqdim ediblər. Məsələ isə çox absurd olsa da, həm də cinayət tərkiblidir. Şikayətçilər iddia edir ki, adlarına olan torpaq sahələrini yerli bələdiyyə sədri saxta ölüm arayışı çıxararaq satıb.
” Mənim torpağım olub. Mən sağ ola-ola mənim torpağımı yerli təşkilatlardan biri- bələdiyyə zəbt edib. Yaşımın keçdiyini nəzərə alıb bu yaxınlarda getdim ki, öz adıma olan torpaq sahəsini oğlumun adına keçirdim. Gedib bələdiyyədən sənəd düzəltmək istəyərkən gördük ki, mənə aid torpaq sahəm zəbt olunaraq satılıb. Halbuki həmin torpaq sahəsi rəsmi olaraq mənim adıma idi.
Həmin şikayətçilərdən digəri, Şabanova Xumar Höcət qızı da eyni iddia ilə üzünü media işçilərinə tutub onların vasitəsilə ölkənin birinci xanımı, Azərbaycan Respublikasının Birinci vitse- prezidenti Mehriban xanım Əliyevaya müraciət edərək ondan bu məsələylə bağlı kömək istəyib. “Təzə bilmişəm ki, sən demə, mən ölmüşəm. Axı, ölü də dirilər? Mən necə ölmüşəm ki, indi sizlərlə danışıram?.. Bu sənədi kim yazıb, kim peçat vurub aydınlıq gətirilsin” .
Qeyd: Nəzərinizə çatdırırıq ki, bu məsələ hələ ki, hüquqi cəhətdən öz təsdiqini tapmayan iddiadır. Qarşı tərəfə söz haqqı verir və eyni ilə fikirlərini ictimaiyyətə çatdırmağa hazırıq.